ឯកឧត្តមរដ្ឋមន្ត្រី នេត្រ ភក្រ្តា ប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ ថ្លែងថា “ សុខភាព ចំណេះដឹង និងសីលធម៌ សម្រាប់ការរស់នៅក្នុងសង្គម “ជាតម្លៃដ៏សំខាន់បំផុតរបស់មនុស្សគ្រប់រូប។ ការខិតខំប្រឹងប្រែងសិក្សារៀនសូត្រយកចំណេះដឹង ដើម្បីបង្កើនតំលៃនៃខ្លួនយើង និងមានអនាគតល្អ, ការសិក្សារៀនសូត្រ គឺជាកាតព្វកិច្ច ដែលត្រូវបំពេញ, ការសិក្សា គឺជាផ្នែកមួយនៃជីវិត។
នេះជាការថ្លែងរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ ក្នុងឱកាសអញ្ជើញជួបសំណេះសំណាលជាមួយបងប្អូនប្រជាពលរដ្ឋ និងចែកកង់ជូនដល់សិស្សានុសិស្សចំនួន ៦០នាក់ នៅ អនុវិទ្យាល័យស្រែជិះ និង អនុវិទ្យាល័យរលួស ស្រុកអូគ្រៀងសែនជ័យ ដែលមានជីវភាពខ្វះខាត និងគ្មានមធ្យោបាយធ្វើដំណើរទៅសិក្សា ។
ពិធីនេះធ្វើឡើងនៅរសៀលថ្ងៃទី១៣ ខែមិថុនា ឆ្នាំ២០២៤ នាអនុវិទ្យាល័យស្រែជិះ ឃុំស្រែជិះ ស្រុកអូរគ្រៀងសែនជ័យ ខេត្តក្រចេះ ដោយមានអញ្ជើញចូលរួមពី ឯកឧត្តម ហេង ចាន់ធួន រដ្ឋលេខាធិការក្រសួងរ៉ែ និងថាមពល ជាប្រធានក្រុមការងាររាជរដ្ឋាភិបាលចុះមូលដ្ឋានស្រុកអូរគ្រៀងសែនជ័យ ខេត្តក្រចេះ ។
តាមរយៈនេះ ឯកឧត្តម នេត្រ ភក្ត្រា ស្នើដល់អាណាព្យាបាល ឳពុក ម្តាយ របស់សិស្សានុសិស្សទាំងអស់ជម្រុញអោយកូនៗបានទៅសិក្សារៀនសូត្រយ៉ាងតិចរហូតដល់ថ្នាក់ទី១២ បើសិនជាប្អូនៗ ក្មួយៗ បោះបង់ការសិក្សានឹងជួបការលំបាករយៈពេលយូរ តែបើសុខចិត្តទ្រាំលំបាករយៈពេលខ្លីក្នុងការសិក្សារៀនសូត្រនឹងទទួលបានចំណេះ ដឹងជ្រៅជ្រះ គឺអាចផ្លាស់ប្តូរវាសនារបស់ខ្លួនឯងបានល្អ ជួយដល់គ្រួសារ ត្រឡប់មកជួយកសាង និងអភិវឌ្ឍ ភូមិ ឃុំ ស្រុករបស់ខ្លួនអោយមានការរីកចំរើន។
ដូច្នេះហើយ ឯកឧត្តម រដ្ឋមន្រ្តី នេត្រ ភក្ត្រា លើក ទឹកចិត្តអោយប្អូនៗសិស្សានុសិស្សទាំងអស់ប្រឹងប្រែងរៀនសូត្ររហូតដល់ចប់មធ្យមសិក្សាទុតិយភូមិ ហើយបើចង់បន្តការសិក្សាថ្នាក់បរិញ្ញាបត្រទៀត ឯកឧត្តម រដ្ឋមន្រ្តី និងក្រុមការងាររាជរដ្ឋាភិបាលចុះមូលដ្ឋាន ស្រុកអូរគ្រៀងសែនជ័យ និង មូលដ្ឋានខេត្តក្រចេះ នឹងជួយរកអាហារូបករណ៍ ដើម្បីបន្តការសិក្សានៅ មហាវិទ្យាល័យ តែបើចង់រៀនជំនាញផ្សេងៗដែលមានរយៈពេលខ្លី គឺរាជរដ្ឋាភិបាលផ្តល់ឱកាសអោយរៀន និងមានកន្លែងអោយស្នាក់នៅ រួមទាំងឧបត្ថម្ភថវិកាជូនក្នុង ១ខែ ២០មុឺនរៀលថែមទៀតផងដែរ ។ ដែលនេះជាការគិតគួរយកចិត្តទុកដាក់ខ្ពស់តាំងតែពី សម្តេចតេជោ ហ៊ុន សែន អតីតនាយករដ្ឋមន្រ្តី ហើយបច្ចុប្បន្នជា ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីអាណត្តិទី ៧ នេះ ។
អំណោយដែលត្រូវចែកជូននាឱកាសនេះរួមមាន កង់ចំនួន ៦០គ្រឿង ផ្តល់ជូនដល់សិស្សានុសិស្សដែលមានជីវភាពខ្វះខាត និងគ្មានមធ្យោបាយធ្វើដំណើរទៅសិក្សាផ្លូវឆ្ងាយ ក្នុងនោះសិស្សអនុវិទ្យាល័យ ស្រែជិះ ឃុំស្រែជិះ ចំនួន ៣០នាក់ និងសិស្ស អនុវិទ្យាល័យឃុំរលួស ឃុំរលួសស្រុកអូរគ្រៀងសែនជ័យ ខេត្តក្រចេះ ចំនួន ៣០នាក់ ក្នុងម្នាក់ៗទទួលបាន កង់ ១គ្រឿង, លោកគ្រូ អ្នកគ្រូ ចំនួន ១១នាក់ ក្នុងម្នាក់ៗ ៥ មុឺនរៀល ក្រុមគ្រូពេទ្យ ៤ នាក់ ក្នុងម្នាក់ ៥មុឺនរៀល, ក្រុមយុវជន សសយក ចំនួន ២០ នាក់ ម្នាក់ៗ ១មុឺនរៀល ។ អាណាព្យាបាលសិស្សចំនួន ៥០ នាក់ ប្រជាពលរដ្ឋចូលរួមចំនួន ៥០នាក់ ក្នុងម្នាក់ៗទទួលបានអង្ករ ១ ថង់ និងក្រមា ១ ៕
