រដ្ឋាភិបាល​កម្ពុជា ​បានសម្រេច​ចិត្ត​កាត់បន្ថយ​ពន្ធ​លើ​ឧស្សាហកម្ម​កៅស៊ូ

ដោយសារ​ការរីក​រាលដាលនៃ​វីរុស ​កូវីដ​ ១៩ ធ្វើឱ្យតម្លៃ​កៅស៊ូនៅលើ​ពិភពលោក​ទទួល​រង​ផលប៉ះពាល់យ៉ាងខ្លាំង​​ ទើបរដ្ឋាភិបាល​កម្ពុជាសម្រេច​ចិត្ត​កាត់បន្ថយ​ពន្ធ​លើ​ឧស្សាហកម្ម​កៅស៊ូ ។

​សម្តេចតេជោនាយករដ្ឋមន្ត្រីបានចុះហត្ថលេខានៅលើអនុក្រឹត្យមួយ​កាលពី​ថ្ងៃទី​ ៨ ​ខែ​មីនា ​ដោយនៅក្នុងអនុក្រឹត្យនោះបាន​បញ្ជាក់ថា ប្រសិនបើ​តម្លៃ​នាំចេញ​កៅស៊ូ​នៅក្រោម ១ ៤០០ ​ដុល្លារ​ក្នុង​ ១ ​តោន​នឹង​មិន​តម្រូវឱ្យ​បង់ពន្ធ​នោះទេ ប៉ុន្តែ​បើ​តម្លៃ​នាំចេញ​ចាប់ពី ១ ៤០០ ​ដុល្លារ​ទៅ​ដល់​ ៣៥០០ ​ដុល្លារ​ក្នុង​ ១ ​តោន ​នឹងត្រូវ​បង់ពន្ធ​ពី​ ២៥ ​ដុល្លារ​ទៅ​ ២០០ ​ដុល្លារ ​។

បច្ចុប្បន្ន​តម្លៃកៅស៊ូ​កំពុង​ធ្លាក់​ចុះក្រោម ១ ៣០០ ​ដុល្លារ​ក្នុង​ ១ ​តោន​ ពោលគឺ​ធ្លាក់ចុះ​ពី​ ១៤០០ ​ដុល្លារ និង​ ១៥០០ ​ដុល្លារ​កាលពីមុន​ ។ បើតាមរបាយការណ៍​របស់​ក្រសួងកសិកម្ម​បាន​ឱ្យ​ដឹងថា ប្រទេស​កម្ពុជា​បាន​នាំចេញ​កៅស៊ូចំនួន ២៨២ ០៧១ តោន ​កាលពី​ឆ្នាំមុនគឺមានការ​កើនឡើង​ ៣០ ​ភាគរយ បើ​ធៀប​នឹង ២១៧ ៥០១ ​តោន​កាលពី​ឆ្នាំ​ ២០១៨​ ។ ការនាំចេញ​កៅស៊ូ​មាន​តម្លៃ ៣៧៧ ​លាន​ដុល្លារ​កាលពី​ឆ្នាំមុន កើនឡើង​ ៣២ ​ភាគរយ​ធៀប​នឹង​ ២៨៦ ​លាន​ដុល្លារ​កាលពី​ឆ្នាំ​ ២០១៨​ ។

ក្នុងរបាយការណ៍ដដែលក៏បាន​បង្ហាញ​ថា ផ្ទៃដី​កៅស៊ូ​សរុបមានចំនួន ៤០៦ ១៤២ ហិកតា​ត្រូវបាន​ដាំដុះ​កាលពី​ឆ្នាំមុន ដោយ​ផ្ទៃដី​ជាង ២៤៧ ១១៣ ហិកតា​ត្រូវ​បាន​ប្រមូលផល​ ៕

អត្ថបទដែលជាប់ទាក់ទង