ករណីហិង្សាដោយចេតនា ដោយបុរសម្នាក់ ចោទគេថាដៀមដាមដាក់ខ្លួន រួចទាញកាំបិតប៉័ងតោកាប់បែកក្បាលហូរឈាម

ភ្នំពេញ៖ មានករណីហិង្សាដោយចេតនា ដោយបុរសម្នាក់ ចោទគេថាដៀមដាមដាក់ខ្លួន រួចទាញកាំបិតប៉័ងតោកាប់បែកក្បាលហូរឈាម។

ហេតុការណ៍នេះបានកើតឡើងនៅវេលាម៉ោង ១០និង៣០នាទីព្រឹក ថ្ងៃទី២ ខែមីនា ឆ្នាំ២០២០  ស្ថិតត្រង់ចំណុចមុខផ្ទះគ្មានលេខ ភូមិតាងៅ សង្កាត់និរោធ ខណ្ឌច្បារអំពៅ រាជធានីភ្នំពេញ។

ជនរងគ្រោះមានឈ្មោះ ញ៉ ហ៊ ភេទប្រុស អាយុ ៥១ឆ្នាំ ជនជាតិខ្មែរ មុខរបរនៅផ្ទះ ស្នាក់នៅផ្ទះកើតហេតុ។ ចំណែកជនសង្ស័យឈ្មោះ ទី ចាន់ប៊ុនណា ភេទប្រុស អាយុ ៣០ឆ្នាំ (ប្រើប្រាស់គ្រឿងញៀន) ជនជាតិខ្មែរ មុខរបរគ្មាន ស្នាក់នៅភូមិតាងៅ សង្កាត់និរោធ ខណ្ឌច្បារអំពៅ រាជធានីភ្នំពេញ។

បើតាមប្រភពព័ត៌មានបានឲ្យដឹងថា មុនពេលកើតហេតុជនរងគ្រោះ បានស្តីបន្ទោសកូនខ្លួនឯង ពេលនោះជនសង្ស័យដែលរស់នៅក្បែរផ្ទះគ្នា និងជាមនុស្សញៀនថ្នាំផង បានចោទជនរងគ្រោះថា និយាយដៀមដាមដាក់ខ្លួន ក៏មានទំនាស់គ្នារួចមានអ្នកជិតខាងជួយឃាត់។ បន្ទាប់មកជនរងគ្រោះ កំពុងឈរជក់បារីនៅចំណុចកើតហេតុ ស្រាប់តែជនសង្ស័យយកកាំបិតប៉័ងតោកាប់ជនរងគ្រោះពីក្រោយចំក្បាលបែកហូរឈាម រួចរត់គេចខ្លួនយកកាំបិតប៉័ងតោបោះចោលបាត់។

លុះដល់វេលាម៉ោង ១និង០០នាទីរសៀលថ្ងៃខែដដែល ជនរងគ្រោះឃើញជនសង្ស័យនៅភូមិតាងៅ សង្កាត់និរោធ ខណ្ឌច្បារអំពៅ ក៏ឃាត់ខ្លួនប្រគល់ឲ្យសមត្ថិកិច្ច៕

អត្ថបទដែលជាប់ទាក់ទង